21B: Aquabrowser en sosjale biblioteekkatalogy

Ja, je kinne yndied op goede ideeën brocht wurde troch de Aquabrowser en suggestjes en tags. Mar út en troch wurde je ek hielendal op it ferkearde spoar set. Sa socht ik de OBA mei help fan it trefwurd 'doopsgezind' en krige ik nota bene as suggestje dêrby 'pausgezind'. No as 'doopsgezinden' ien net snuve hearre wolle, dan is it de paus wol. Foar de hân lizzende suggestjes as 'mennonieten' en 'men(n)isten' waarden net suggerearre, wol (n.b.) 'duitsgezinden'.

Koartsein: suggestjes, trefwurden en tags kinne je o sa helpe, mar se moatte fansels wol mei ferdrach lêzen en brûkt wurde.

Genealogy

Opfallend fûn ik, wie de earste sin fan dit ding: "Genealogie is een populaire hobby ...". Yn Van Dale stiet noch altyd dat "genealogie" de "leer" is "van de ontwikkeling en verwantschap van geslachten". Fan wittenskip is genealogy dus evoluearre (of devaluearre, sa't men wol) ta in troch smiten folk útoefene leafhawwerij. It is moai dat de genealogy safolle minsken lûkt, mar tagelyk hâldt dat yn, sa't men dat op de sites dy't ek no sjoen haw ek sjen kin, dat genealogy fariearret fan hiel earnstich ûndersyk ta it byinoarpongjen fan wat gegevens sûnder dat goed neigien wurdt oft dy gegevens wol krekt binne.

My foel ek op hoefolle oft der noch njonkeninoar wurke wurdt. Benammen wat oparbeidzjen oangiet, is der op de sites noch in soad te winnen.

It sil wol mei privacyredenen te meitsjen hawwe, mar ek waard my dúdlik dat in hiel soad minsken har gegevens ôfskermje. Wol men dy gegevens al brûke, dan moat men navenant in soad wurk dwaan. Allinne it registrearjen hieltyd, is in hege drompel.

Opdracht 20: Muzyk

Efkes wat favoriten besocht te finen. Mar dat foel noch net ta. Mei Al Jarreau hie ik noch it measte súkses. By it hiel soad wiene de 'tracks' net beskikber. Dat jildt ek foar bekende Fryske nûmers. Fan Gurbe Douwstra koe ik ek neat te hearren krije. Fansels soe it wol hiel aardich wêze om te besykjen om op LAST FM dat te krijen wat rjochtenfrij en oanwêzich is yn it lûd/muzykargyf fan Tresoar.

Opdracht 19: Sociale Media

Sûnt tiden doch ik al mei: de iene tiid mear dit en de oare tiid mear dat. Yndertiid: Hyves, YahooGroups en MySpace. No mear Facebook en LinkedIn. Bytiden wit ik net iens mear goed wat ik allegear al by d' ein hân haw.

Foar de biblioteken binne der foaral goede mooglikheden om communities te foarmjen: leafhawwers fan bygelyks boeken fan Jules Verne dy't mei-inoar in groep foarmje en dy't fia de biblioteken ynformaasje krije oer de nijste publikaasjes. Mar sokke groepen kinne fansels ek ris útnoege wurde by Tresoar om nei in lêzing of sokssawat te kommen.

Privee brûk ik dizze media it measte om filmkes, foto's etc. te besjen en om - ferlykber mei e-mail - nijtsjes út te wikseljen.

LibraryThing

In skoft lyn kaam ik der efter dat ik alris in biblioteek oanmakke hie op LibraryThing en dat by hiel wat boeken dy't ik oanjûn hie kollega Andrys Stienstra de iennige wie dy't dy boeken ek yn syn LibraryThing boekekast hie.

It soe neffens my in goed ding wêze dat Tresoar ek ien fan de biblioteken wurdt dy't minsken rieplachtsje kinne as sy by LibraryThing nei in titel sykje. In hiel soad titels dy't wol by ús binne, fynt men net yn de KB. Allinne om dy reden al soe dat goed wêze.

Benammen om mieningen fan oaren oer boeken te lêzen is LT nijsgjirrich, tinkt my. In lestich punt by populêre boeken mei hiel wat ûnderskate printingen/útjeften is dat je dan by al dy ûnderskate printingen/útjeften sjen moatte.

Opdracht 17: Google Maps en Street View

Wylst je op de kaarten fan Google Maps fansels alderhanne foto's pleatse kinne fan skriuwers by de plakken dêr't skriuwers berne binne, wenne hawwe of ferstoarn binne, kin oarsom op bygelyks www.sirkwy.nl ek kaartsjes pleatst wurde dy't geografysk alderhanne biografyske data fan in skriuwer werjaan kinne. Mei help fan âlde foto's fan de lokaasje en nije street views kin dan bygelyks ek krekt werjûn wurde hoe't in bepaald plak der yn de skriuwer syn tiid útseach en hoe't dat no werjûn is yn 'Street View'. Fansels frette sokke dingen wol in soad tiid, as men dat goed dwaan wol, mar it kin, tinkt my, wol in soad nijsgjirrige fragen beänderje.

Opdracht 16: Mobyl Ynternet

As der in GPS-systeem op de mobile tillefoan sit, soe ek fuort alderhanne ynformaasje oer literêre saken werjûn wurde kinne. As men dan bygelyks yn Boksum is, kin men fuort sjen wêr't it bertehûs fan Ulbe van Houten en dat fan Douwe Kalma binne. Ek oare ynformaasje soe jûn wurde kinne: hiele filmkes oer beide skriuwers soene bygelyks toand wurde kinne. Foar wat boeken oangiet, soe ek noch hiel wat dien wurde kinne. As in skriuwer oanjûn hat wêr't er krekt in boek skreaun hat - en dat hat Anne Wadman bygelyks wol dien - dan soe dat ek oanjûn wurde kinne. Mar ek soe men, as men bygelyks wit wêr't in boek him ôfspilet, dat oanjaan kinne. Yn it gefal fan Sjoerd van der Schaaf syn roman Abbingawâld is bygelyks bekend dat Van der Schaaf mei Abbingawâld Beetstersweach op it each hie. Ek dat soe oanjûn wurde kinne. Yn hoefier't dat mei (boeken fan) noch libjende skriuwers dien wurde mei, is fansels de fraach.Ynearsten soe men begjinne kinne mei de ferstoarne skriuwers. In helpmiddel soe wêze kinne, de atlas op DBNL, http://www.dbnl.org/atlas/plaats.php?id=leeuw001, dat al in maoi priuwke jout fan alles dat mooglik is.